213
క్రీస్తు పునరుత్థాన చరిత్రము
రా - ఆనంద భైరవి, తా - ఏక
(ఛాయ: ఓ మా తండ్రి)
మరణమున్ జయించి లేచెను - మన ప్రభువు నేఁడు - మహిమ దేహ ¹మొనరఁ దాల్చెను = ధర సమాధి బంధములను - ధన్యముగను త్రెంచి లేచి - కొఱత లన్ని తీర్చి జీవ - వరము లియ్య వసుధపైని ||మరణమున్||
1.మరియయును సలోమి మొదలగు - మగువలు సబాతు - మరు దినోదయమునఁ బ్రియ మగు = గురుని దేహమునకుఁ బూయఁ - బరిమళంపుఁ దైలములను - సరగఁ దీసికొని సమాధి - కరుగుదెంచి కనులఁజూడ ||మరణమున్||
2.నేఁడు ప్రభుసమాధి ముఖముపై - నున్న రాయి - నెవఁడు దీయు కరుణను మనకై - ²చేడియ లిట్లనుచు వేగఁ - జేరి యా సమాధి మూఁత వీడి యుంటఁ జూచి మిగుల - విస్మయమ్ము నంది రపుడు ||మరణమున్||
3.వారు తెల్ల నిలువుటంగిఁతో గూర్చున్న పడుచు - వానిఁ జూచి మిగుల భయముతోఁ = జేరరాక నిలిచియున్న వారి నతడుగాంచి యమ్మ - లార భయపడకు డటంచు - ³నూరడించె నుచితముగను ||మరణమున్||
4.కొరత పైని మరణ మొందిన - నజరేయుఁ డేసు - కొరకు మిగుల వెదకు చుండిన = ⁴తరుణులార మీ ప్రభుండు - తిరిగి బ్రతికె నిక్క మిద్ది - సరగపేతు రాది శిష్య - సమితితోడఁ జెప్పుడనియె ||మరణమున్||
5.మానితముగ మీకిట ముందు - ప్రభు వనిన యట్లు - కానఁబడును గలిలైయ మందుఁ = గాన వెళ్లుడంచు భాసి - తానరుండు పల్క వినుచు - దీన జనులు జడిసి మిగుల - దిగులు నొంది వణకి రపుడు ||మరణమున్||
6.మొదట మగ్దలేనే మరియకుఁ - గనఁబడె నటంచు - సుదతి దెల్పె శిష్య వరులకు = కొదువలేని సంతసమునఁ - గోర్కె దీరఁ బ్రభునిఁ జూడఁ - బదిలమైన యత్నములకుఁ - బరఁగఁ జేసి చూచి రపుడు ||మరణమున్||
7.అంతఃశత్రు వైన మరణమును - ప్రభువు గెల్చె - సంతసించి సన్నుతింతము = వంత లేల భక్తులార - వాస్తవముగ మనల నిటుల - నంత్య దినము నందు లేపు - నమల దేహముల నొసంగు ||మరణమున్||
– మురారి దావీదు
___________________________
¹చక్కగా. ²స్త్రీలు. ³ఆదరించెను. ⁴స్త్రీలారా.
No comments:
Post a Comment