త్రోవలో నీవుంటివో - త్రోవప్రక్క పడియుంటివో
త్రోవ చూపిన నజరేయుని కనలేని అంధుడవైయుంటివో
అ.ప: జీవితపు ఈ యాత్రలో నీ పరిస్థితి తెలుసుకో
జీవమార్గం క్రీస్తులో నిన్ను నీవు నిలుపుకో
1. చెరిపివేసుకున్నావు నీదు మార్గమును -
చెదిరి ఎన్నుకున్నావు స్వంత మార్గమును
పాపపు అంధకారంతో మార్గం కనరాకయుంటివే -
చీకటి దారిన పయనంతో మరణం కొనితెచ్చుకుంటివే
2. సిద్ధపరచెను యేసు నూతన మార్గమును
బలిగ అర్పణగ చేసి శరీరరక్తమును
సత్యమైన ఆ మార్గంలో జీవం క్షేమం ఉందిలే
నిత్యుడు ఆ దేవుని చేరే ధైర్యం కలిగించిందిలే
3. నడచి వెళ్ళుచున్నావా అరణ్యమార్గమున
గమ్యమెరుగకున్నావా జీవనగమనమున
పర్వతములు త్రోవగ చేసి నీటి యొద్దకు చేర్చులే
త్రోవలను తిన్నగ చేసి ఆత్మదాహమును తీర్చులే
