184
ఆశ్చర్యకరమైన సిలువ
రా- పున్నాగ తోడి, తా- త్రిపుట
(ఛాయ:ఎంతో సుందర మైనవి)
ఏమాశ్చర్యము ప్రియులారా - క్రీస్తు మరణము - ప్రేమజూడరెమనసార = ఆ మహాత్ముఁడు మరణ - మగు రీతిఁ గనుకొన్న - సామాన్యమగు నొక్క - జనుని చందము గాదు = ఈ మహిని గల పాప జీవుల - పై మహాకృపఁ జూపి నిత్య - క్షేమ మొసఁగెడు కొరకు బలు శ్రమ - చే మృతుండైనాఁడు స్వేచ్ఛను ||ఏమాశ్చర్యము||
2.కొండవలె భారమై - లోక పాపములు - దండింపఁబడె ఘోరమై = నిండు భారము క్రింద - నిలుచున్న వేళను - గుండె దిగులునఁ దనువు - నిండె రక్తపుఁ జెమట = మెండుకొని దుఃఖములతో నా - తండ్రి యీ పాత్రమును నా కడ - నుండి తొలగించుటకు మనపై - యుండినను జేయమని వేఁడెను ||ఏమాశ్చర్యము||
3.కడు దుర్మార్గులచేతను - క్రీస్తుఁడు పట్టు - వడె దానంతట తాను = చెడుగు లెందరు నింద - జేసి మోముపై ¹నుమిసి - వడిముళ్లతో నల్లఁ - బడిన కిరీటము = ²తడయ ³కౌదల బెట్టి కరముల - నడుగులను సిలువ నిడి మేకులు - ⁴దొడిపి ప్రక్కను రక్తజలములు - ⁵దొరగ ⁶గుంతము గ్రుచ్చి రహహా ||ఏమాశ్చర్యము||
4.ఇరు ⁷పార్శ్యముల నిద్దరి - దొంగల - నునిచి మరణావస్థలఁ బెట్టిరి = నిరపరాధి ప్రభువు - దురితాత్ము లొనరించు - తరుచు బాధల కోర్చి - మరి వారిఁ గరుణించి = యెరుఁగ రేమి యొనర్తురో యీ - దురిత జీవులు వీరి నోహో - పరమ ⁸జనక క్షమించు మని తన - ⁹యరుల కొరకై వేఁడు కొనియెను ||ఏమాశ్చర్యము||
– పురుషోత్తము చౌదరి
_________________________________
¹ఉమ్మివేసి. ²ఆలస్యముచేయక. ³తలమీఁద. ⁴గ్రుచ్ఛి. ⁵దొర్లునట్లు. ⁶ఈటె. ⁷ప్రక్కల. ⁸తండ్రీ. ⁹శత్రువులు
No comments:
Post a Comment