Nenunu na intivarunu | నేనును నా యింటివారును

518

క్రైస్తవుని ప్రతిజ్ఞ

రా - యమునా కల్యాణి,  తా - త్రిపుట

(జీవితాంతము వరకు)

 

నేనును నా యింటివారును - నీతిసూర్యుని గొలుతుము = దీనమనసును గలిగి దేవుని - దివ్య సేవను జేతుము ||నేనును||

 

1.అనుదినంబును ప్రభుని దలచుచు - అలయకను ప్రార్థింతుము = అనవరత మా ప్రభుని చిత్తము - ననుకరింతుము పనులలో ||నేనును||

 

2.వేదవాక్య పరసమందు - విసుగు చెందక నుందుము = ఆదరంబున దైవ చిత్తము - ననుసరించుచు నడుతుము ||నేనును||

 

3.ఆశతోడను ప్రభుని దినమును - నాచరింతుము మరువక = విసుకు జెందక నాలయమునకు - పిన్న పెద్దల దెత్తుము ||నేనును||

 

4.సంఘ కార్యక్రమములందు - సహకరింతుము ప్రీతితో = భంగ పరచెడి పనులనన్నిటి - కృంగ దీసెదమనిశము ||నేనును||

 

5.ప్రేమతోడను పొరుగువారిని - ప్రియులుగను భావింతుము = క్షమయు స్నేహము నేర్చి ప్రభుకడ -  శాంతితో జీవింతుము ||నేనును||

 

6.శక్తికొలది శరీరబలమును - శ్రమను క్రీస్తుకు నిత్తుము= భక్తితో హృదయమును పూర్తిగ - ప్రభునికే యర్పింతుము ||నేనును||

 

7.చిన్న వారలు దైవరాజ్యపు - చిఱుత వారసులంచును = అన్ని వేళల వారి వృద్ధికి - మిన్నగ దోడ్పడెదము ||నేనును||

 

8.పెద్దవారలు దైవజనులని - పేర్మితో భావింతుము = శుద్ధుడగు ప్రభు క్రీస్తు మనసును - శ్రద్ధతోడను జూపుచు ||నేనును||

 

9.జీవితంబున ప్రభుని ప్రేమా - శిస్సులను ప్రసరింతుము = దివ్యజ్యోతుల రీతి వెలుగుచు - దివ్య సన్నిధి నుందుము ||నేనును||

   - ఏ. చార్లెస్ కిన్సింగర్

DOWNLOAD MP3 SONG HERE