231
క్రీస్తు శరణు గోరుట
(చాయ: నాడు వచ్చినట్లు గాదు)
రా - ముఖారి, తా - ఆది
ఓహోహో మా యన్నలారా - యుద్యోగింపండి = యిపుడే - ¹త్రాహి త్రాహి యనుచుఁ క్రీస్తుని - దయను గోరండి ||ఓహో||
1.అంత్యదినము నాటి బాధ - లాలకించండి = నరక - ప్రాంతమునకుఁ బోకమునుపే - ప్రభువును వేడండి ||ఓహో||
2.మింట ప్రభువు ²తేజోమయమౌ - మేఘారూఢుండై = యగ్ని - మంట వీను సింహాసనము - నంటి కూర్చుండు ||ఓహో||
3.అంధకారమగును సూర్యుఁడా దినమందు = ³కుముద - బాంధవుడు మిగుల రక్త - వర్ణము నొందును ||ఓహో||
4.కడు భీతిగ సర్వసృష్టి - కంపించుచు నుండున్ = భూమి ⁴కడలి ⁵యభ్రము తాపమున - కరిగి పోవుచుండున్ ||ఓహో||
5.నరక ప్రచండాగ్ని గుండ - మరదై గన్పడును = దానిఁ - జొరక మరి యే తెరువు పాపా - త్ములకు గలుగును ||ఓహో||
6.ప్రేమతో నడిగెదను నా - ప్రియబంధువులార = మీర - లామహా దినమందున దిరమై - యట నిలువంగలర ||ఓహో||
7.కామక్రోధ లోభమోహ - గర్వగుణములను = మీరు - ప్రేమించి చేసితిరి గద - పెక్కు విధములను ||ఓహో||
8.కల్లలాడుచుడి ప్రొద్దుఁ - గడుపుచుంటిరే = యింక - చిల్లర వేల్పుల పూజ - చేయుచుంటిరే ||ఓహో||
9.ప్రకటంబుగ నైన మరి ⁶గు - ప్తస్థల మందైన - చేయు - సకల క్రియలు ప్రభువున కెఱుక - సంపూర్ణముగాను ||ఓహో||
10.జాతి గోత్రమడుగఁ బోడు - సర్వేశ్వరుండు = క్రియల - రీతి మనసు మాత్రమె విచా - రించు ప్రభువతఁడు ||ఓహో||
- పురుషోత్తము చౌదరి
--------------------------------------
¹రక్షించుము. ²తేజోవికారము. ³చంద్రుడు. ⁴సముద్రము. ⁵ఆకాశము. ⁶రహస్యమైన.
No comments:
Post a Comment