151
పుట్టిగ్రుడ్డికి చూపునిచ్చుట
రా - నవరోజు, తా - త్రిపుట
అందమైన క్రీస్తు కథ మీ - రాలింపరయ్య ||అందమైన||
1.పొందుగ శిష్యులతో యేసు - పోవుచుండు మార్గమందు - ముందుగ ¹వీక్షించి రొక్క పు ²ట్టంధకుని = అందుఁ గొందఱు శిష్యు - లాత్మలో భావించి - రెందు కీతఁడు ³చీక - య్యెను దీని విధమేమో - డెందములనుఁ గల్గు - సందియములు వీడ - విందమనుచు లోక - ⁴వంద్యుని సంతతా = నందుని మనుజ - ⁵నందనుని నడిగిరప్పు ||డందమైన||
2.చీకువాఁడై జన్మించుటకుఁ జేసెనా దుష్కృతము నితఁడు - లేక వీని ⁶జననీ జనకు - లేమి చేసిరో = యీ కారణముఁ దెల్పు - మోకర్త యిపుడీవు - మాకంచు తను వేఁడ - లోకేశ్వరుండు ని - రాకారుఁ డితనియం - దీకార్యములుఁ జూపఁ - బ్రాకటముగఁ జేసెఁ - గాక వేరొకవిధము = లేకున్నదని తెల్పి - చీకుఁ బ్రోవఁ దలంచె ||నందమైన||
3.బురద వాని కన్నులందుఁ - ⁷గరములతోఁ ⁸జమిరియొక్క చెఱవులో ⁹బ్రాక్షాళించుటకు - సెలవిచ్చెఁ బ్రభువు = బిరబిర నయ్యంధుఁ - డరిగి యేసుని పల్కుఁ - దిరముగ మదినమ్మి - ¹⁰సరసిలో మునిఁగి సుం - దరమైన నేత్రముల్ - ధరియించి యానంద - భరితుడై చనుదెంచు - ¹¹తఱివాని పొరుగింటి = నరులబ్బురముగఁ జూ - చిరి మార్మోమగువాని ||నందమైన||
4.చూపులేని గ్రుడ్డివానిఁ - జూడఁ గలుగఁజేయువాఁడే - పాపాంధకార ¹²మగ్నుల నా - ప్రభువే రక్షించు - పైపైని మనకన్ను - చూపు చూపది గాదు - లోపలి కనుగుడ్డి - యైపోయి యున్నది - యాప ¹³త్పరంపర - లోఁ బొరలుచున్నాము - కాపాడుమని యేసు - శ్రీ పాదములుఁ బట్టి = చూపు లోపలి చూపుఁ - జూచి యానందింత ||మందమైన||
– పురుషోత్తము చౌదరి
---------------------------------------------
¹చూచిరి. ²గుడ్డివాని. ³గుడ్డి. ⁴స్తోత్రింపబడిన. ⁵కుమారుని. ⁶తలిదండ్రులు. ⁷చేతులతో. ⁸వ్రాసి. ⁹కడుగుకొనుటకు. ¹⁰చెఱవులో. ¹¹సమయమున. ¹²ముణిగిన. ¹³సమూహము.
No comments:
Post a Comment