Chuda goreda deva | చూడ గోరెద దేవ మందిరావరణములను

19

దేవుని మందిరావరణములు

(దావీదు కీర్తన 84)

రా - హిందుస్థాని,  తా - జుల్వ

(చాయ: సాక్ష్యమిచ్చెద)

చూడ గోరెద - దేవ మంది రావరణములను - చూడ గోరెద = చూడ నాకు నాశ గలదు - సుంద రావరణము లవి = చూడ నాదు ప్రాణమెంతో - సొమ్మ సిల్లుచున్న దహా ||చూడ||

 

1.నీదు నివాసములు జూడ - నెంతో రమ్యమై తనర = నాదు హృదయమునకు నంద మిచ్చు నిపుడు నెపుడు ||జూడ||

 

2.జీవము గల ప్రభుని జూడ - జీవి నాలో కేక వేసె = కోవెలలకు దొటికె గూటి - తావు నీ మందిరమున ||చూడ||

 

3.పిచ్చుకలకు దొటికె స్థలము ముచ్చట బలిపీఠ మెదుట = పెట్టు కుతూహలముతోను - పిల్లల నవి మందిరమున ||చూడ||

 

4.నీదు మందిరంబులోన - నిత్యవాసులైనవారు = నిక్కముగను ధన్యులగుచు నిన్ను నన్నుతింతు రహా ||చూడ||

 

5.ప్రభుని వలన బలము నొందు ప్రజలు ధన్యులగుదు రిల = ప్రాణ ప్రియము యాత్ర సేయు ప్రజల మార్గ మమర ధరను ||చూడ||

 

6.నీదు యావరణములలో - నేను నొక్క దినము గడుప = నెంతో విలువ గల నాకు - వేయినాళ్ల బ్రతుకు కన్న ||చూడ||

 

7.కానరండు మనము నిపుడె - మనము లలర ప్రభుని జూడ = మందిరమున కేగి నిండు - మన శ్శాంతి బొంది బ్రతుక ||జూడ||

                         - ఎం. జే రామాంజులు