Ningilo Chanduruda Mandagaache | నింగిలోని చందురుడా మందగాచే

నింగిలోని చందురుడా - మందగాచే ఇందురుడా

నిందలేని సుందరుడా - గంధమొలికే చందనుడా 

ఓ .. వెన్నెలంటి చల్లని రాజా - వెన్నలాంటి మనసు నీదయ్యా 

1. ఎర్రటి ఎండ కాల్చేస్తున్నా - గాయాలు నిన్ను బాధిస్తున్నా 

దాహంతో నోరు ఎండిపోతున్నా - నాలుక అంగిట అంటిపోతున్నా 

ప్రేమతో పెంచి మమతలు పంచిన - నీ శ్రమ చూడలేక గుండె పగిలిన 

తల్లిని శిష్యునికప్పగించి నీ బాధ్యతను నెరవేర్చినావా 

ఓ ... వెన్నెలంటి చల్లని రాజా - ఎంత ప్రేమమూర్తి నీవయ్యా 

2. అందాలమోము పై ఉమ్మివేయగా - నీదు గడ్డము పట్టిపీకగా 

యూదుల రాజని అపహసించగా - సిలువ దిగిరమ్మని పరిహసించగా 

అంతా సహించి మౌనం వహించి - బాధించు వారిపై ప్రేమ చూపించి 

ఏమి చేస్తున్నారో ఎరుగరు క్షమించుమని ప్రార్థించినావా 

ఓ .... వెన్నెలంటి చల్లని రాజా - ఎంత సహనం చూపినావయ్యా 

3. లేత మొక్కలాంటి నీ దేహము పై కొరడాలెన్నో నాట్యము చేయగా 

మేలే చేసిన కరుణను పంచిన కాళ్ళు చేతులలో సీలలు కొట్టగా 

అంతటి శ్రమలో చెంతను నిలిచి - చింతతో ఉన్న అతివల జూచి 

నాకోసం ఏడ్వవలదని పలికి వారిని ఓదార్చినావా 

ఓ .... వెన్నెలంటి చల్లని రాజా - ఎంత కరుణామయుడ నీవయ్యా